मेंढपाळांच्या बालकांचे सामाजिकसर्वेक्षण करण्याचे जिल्हाधिकारी यांचे आदेश; सामाजिक संस्थेची मदत घेण्याचे निर्देश

 

लोकनेता  न्यूज

(ऑनलाईन न्यूज नेटवर्क)     

अहमदनगर.दि.१३:- अहमदनगर जिल्ह्यातील संगमनेर व पारनेर तालुक्यातील काही मेंढपाळांनी  बालकांना  मेंढी व दोन हजार रुपयांत विकत घेऊन वारंवार त्यांच्यावर अत्याचार करून, त्यांच्या क्षमतेच्या पलिकडे त्यांच्याकडून मजूरी करुन घेत असल्याच्या घटनेची  पोलिसांनी दखल घेऊन आरोपींना ताब्यात घेतले आणि त्यांच्यावर गुन्हे दाखल करुन अल्पवयीन व बेठबिगार बालकांची सुटका केली आहे.

या पार्श्वभूमीवर जिल्हास्तरीय वेठबिगार समितीची आढावा बैठक आज, दिनांक १२ सप्टेंबर,२०२२ रोजी जिल्हाधिकारी डॉ. राजेंन्द्र भोसले यांच्या अध्यक्षतेखाली अहमदनगर जिल्हाधिकारी कार्यालयात पार पडली. बैठकीत वेठबिगार व बालकामगार यांच्यावर होणारा अत्याचार थांबविण्यासाठी व भविष्यात त्यांच्यावर अत्याचार होणार नाही यासाठी जिल्ह्यातील मेंढपाळांकडे असलेल्या बालकांचे सर्वेक्षण करण्यासाठी पथक स्थापन करुन सामाजिक संस्थेच्या मदतीने सर्वेक्षण करण्याचे निर्देश जिल्हाधिकारी यांनी दिले. 

कोणत्याही गावात किंवा शहरात बालकामगार व वेठबिगार आढळून आल्यास, नागरिकांनी संबंधीत पोलिस ठाण्यात तक्रार करावी असे अवाहन जिल्हाधिकारी यांनी केले असल्याचे निवासी उपजिल्हाधिकारी तथा जिल्हास्तरीय वेठबिगार समितीच्या अध्यक्षा पल्लवी निर्मळ यांनी प्रसिद्धी पत्रकाद्वारे कळविले आहे.