लोकनेता न्यूज
(ऑनलाईन न्यूज नेटवर्क)
काबूल: अफगाणिस्तानमधील राजकीय नेतृत्व आणि लष्करी
अधिकाऱ्यांनी शरणागती पत्करल्याने तालिबानने पुन्हा सत्ता स्थापन केली आहे. तालिबान सरकार
स्थापनेसाठी हालचाल करत असताना दुसरीकडे अफगाण जनता रस्त्यावर उतरली आहे.
अफगाणिस्तानच्या स्वातंत्र्य दिनानिमित्त तालिबानची दहशत झुगारून देत नागरिकांनी
राजधानी काबूलसह इतर ठिकाणी अफगाणिस्तानचा राष्ट्रध्वज फडकवला. काही ठिकाणी
महिलांचा सहभाग लक्षणीय होता. असाबाद येथे तालिबानींनी केलेल्या गोळीबारात तीन जण
ठार झाल्याचे वृत्त आहे.
अफगाणिस्तानमध्ये
स्वातंत्र्य दिनाच्या निमित्ताने झालेल्या या आंदोलनात अफगाणिस्तानच्या महिलांचाही
सहभाग दिसून आला. काबूलमध्येच मंगळवारी काही महिलांनी शिक्षण, रोजगार व अभिव्यक्ती स्वातंत्र्य अबाधित
ठेवण्याची मागणी करत सशस्त्र तालिबानींसमोर आंदोलन केले होते. या आंदोलनाची जगभरात
चर्चा झाली.
दरम्यान, उपराष्ट्रपती अमरुल्ला सालेह यांनी स्वत:ला
राष्ट्रपती घोषित करून युद्ध अजून संपले नसल्याचे म्हटले होते. आधीच्या तुलनेत आता
राज्य करणे हे तालिबानला अधिक आव्हानात्मक असणार असल्याचे म्हटले जात आहे.
भविष्यात तालिबानविरोधात लोकांचे आंदोलन पेटण्याची शक्यता असल्याने तालिबान
कट्टरतावादापेक्षा लवचिक धोरण स्वीकारत असल्याची चर्चा आहे. तालिबानने सत्ता हाती
घेतल्यानंतर काबूलमध्ये काही मोजक्याच महिलांनी आंदोलन केले. तालिबानी राजवट येताच
महिलांच्या अधिकारांबाबत चर्चा होत असताना हे आंदोलन झाले.
0 टिप्पण्या