वरिष्ठांच्या जाचाला कंटाळून पाथर्डीत डॉक्टरची लसीकरण केंदातच आत्महत्या

 

*सुसाइड नोटच्या आधारे पोलिसांनी केला गुन्हा दाखल.

 

लोकनेता  न्यूज

(  ऑनलाईन न्यूज नेटवर्क  )

नगर: पाथर्डी तालुक्यातील कंरजी येथील आरोग्य केंद्रावर करोना प्रतिबंधक लसीकरण सुरू असतानाच तेथील डॉक्टरने आत्महत्या केली. उपकेद्रांतील आरोग्य अधिकारी डॉ.गणेश शेळके (वय ४५, रा. बहिरवाडी, ता. नेवासा) यांनी गळफास लावून वरिष्ठांच्या जाचाला कंटाळून टोकाचे  पाउल उचलत जीवन संपवले. जिल्हाधिकारी, तहसीलदार आणि तालुका वैद्यकीय अधिकऱ्यांच्या जाचाला कंटाळून आत्महत्या करीत असल्याची सुसाइड नोट पोलिसांना आढळून आली आहे. त्याआधारे पोलीसानी गुन्हा दाखल केला आहे.

डॉ. गणेश शेळके करंजी आरोग्य उपकेंद्रात समुदाय अधिकारी म्हणून कार्यरत होते. आज सकाळपासून करंजी आरोग्य उपकेंद्रात करोना प्रतिबंधक लसीकरण सुरू होते. दुपारी डॉ. शेळके यांनी तेथील आरोग्य कर्मचाऱ्यांकडे कागद व पेन मागितला. त्यानंतर त्यांनी केबिनचा दरवाजा बंद करून घेतला. बराच वेळ झाला तरी दरवाजा उघडला नाही, त्यामुळे आरोग्य कर्मचाऱ्यांनी डॉ. शेळके यांना आवाज दिला. मात्र, आतून प्रतिसाद आला नाही. त्यामुळे उपस्थित कर्मचारी घाबरले. त्यांनी दरवाजा तोडला असता आतमध्ये डॉ. शेळके यांनी पंख्याला गळफास लावून घेतल्याचे आढळून आले.

ही माहिती पोलिसांना देण्यात आली असता सहायक पोलीस निरीक्षक कौशल्य वाघ पथकासह तेथे आले. त्यांनी शेळके यांचा मृतदेह काढून पुढील कार्यवाही सुरू केली. तेथील कर्मचाऱ्यांनी सांगितले की, सकाळपासूनच डॉ. शेळेक तणावात दिसत होते. मात्र, त्याबद्दल ते काहीच बोलले नाहीत. लसीकरण सुरू असताना ते केबिनमध्ये बसून होते. दुपारी एकच्या सुमारास त्यांनी कर्मचाऱ्याला आवाज देऊन पेन व कागद मागितला. त्यानंतर त्यांनी दरवाजा बंद करून घेतला. त्यावेळी कोणालाही काही संशय आला नाही. बराच वेळ झाल्यानंतर ही घटना उघडकीस आली.

दरम्यान, डॉ. शेळके यांनी आत्महत्या करण्यापूर्वी लिहून ठेवलेली चिठ्ठी पोलिसांच्या हाती लागली आहे. त्यामध्ये शेळके यांनी म्हटले आहे की, तालुका वैद्यकीय अधिकारी, तहसीलदार, जिल्हाधिकारी व प्रशासनाच्या जाचाला कंटाळून आपण आत्महत्या करीत आहोत. वेळेवर पगार न मिळणे, अतिरिक्त कामाचा भार, असा त्रास होत असल्याचे डॉ. शेळके यांनी चिठ्ठीत म्हटले आहे.