पुणे जिल्ह्याला 'असा' बसला तौत्के चक्रीवादळाचा तडाखा

 

लोकनेता न्यूज

( ऑनलाईन न्यूज नेटवर्क  )

 पुणे: तौत्के चक्रीवादळाचा फटका पुणे जिल्ह्यालाही बसला असून घरांच्या भिंती कोसळल्याने आणि पत्रे उडाल्याने १९० घरांचे नुकसान झाले आहे. या घटनांमध्ये तीन जण जखमी झाले आहेत. भोर तालुक्यात वादळी पावसामुळे ९० लोकांना सुरक्षित ठिकाणी स्थलांतरित करण्यात आले आहे. दरम्यान, पुण्यात दिवसभर पाऊसही जोरदार बरसला. बाणेर रोडवर सखल भागात पाणी साचल्याने वाहनांना कसरत करावी लागली.

पुणे जिल्ह्यातील मुळशी, भोर, मावळ, खेड आणि आंबेगाव या तालुक्यांना चक्रीवादळाचा तडाखा बसला. खेड तालुक्यात सर्वाधिक ९५ घरांचे नुकसान झाले आहे. मुळ्शी तालुक्यात ७५, भोरमध्ये नऊ, मावळ तालुक्यात दहा आणि आंबेगावमध्ये एका घराचे नुकसान झाल्याचे जिल्हा आपत्ती व्यवस्थापन विभागाकडून सांगण्यात आले. शिरुर तालुक्यामध्ये एका घराची पडझड झाल्याने दोन व्यक्ती किरकोळ जखमी झाल्या. प्राथमिक उपचारानंतर त्यांना घरी सोडण्यात आले. खेड तालुक्यामध्ये घराची पडझड झाल्याने एकजण जखमी झाला. बारामती तालुक्यामध्ये विजेचा धक्का बसल्याने दोन शेळ्या आणि दोन मेंढ्या मरण पावल्याची घटना घडली.

मुळशी तालुक्यातील खांबोली गावातील जिल्हा परिषदेची प्राथमिक शाळा, ताम्हिणी गावचे ग्रामपंचायत कार्यालय, खेड तालुक्यातील दिवेगाव येथील प्राथमिक शाळा; तसेच खेडमधील भोरगिरी गावातील ग्रामपंचायत कार्यालय आणि अंगणवाडीचे नुकसान झाल्याचे जिल्हा आपत्ती व्यवस्थापन विभागाकडून स्पष्ट करण्यात आले.

नाशिकमध्येही वादळी वारे
 शहरातील कमाल तापमानात दिवसभरात ६.८ अंश सेल्सियसनी घट झाली. हंगामात पहिल्यांदाच दिवसभरात इतक्या मोठ्या प्रमाणात तापमान घटले. सोमवारी सायंकाळी २८.३ अंश सेल्सियस कमाल तापमानाची नोंद केली गेली. दिवसभरात शहरात ताशी १३ किलोमीटर वेगाने वारे वाहिले. वाऱ्यांचे वेग अजूनही कायम आहे. सकाळी ८१, तर सायंकाळी ६१ टक्के आर्द्रतेची नोंद झाली. वादळाचा ग्रामीण भागाला फटका बसला. सुरगाणा तालुक्यातील सांबरखल जिल्हा परिषद शाळेचे पत्रे उडाले. नाशिक, इगतपुरीला हवामान विभागाने ‘ऑरेंज अलर्ट’ दिला असून रात्री घाटमाथ्यासह जिल्ह्यात मुसळधार पावसाचा अंदाज आहे. यावेळी ताशी ५०-६० कि.मी. वेगाने वारे वाहण्याची शक्यता आहे.