भारताने बांधलेल्या धरणावर तालिबानी आले हल्ला करायला मात्र झाले असे काही ...

 

लोकनेता  न्यूज

(ऑनलाईन न्यूज नेटवर्क)

 

काबूल: अफगाणिस्तानमधील सरकार उलथवून सत्ता हाती घेण्यासाठी तालिबानकडून जोरदार प्रयत्न सुरू आहेत. हेरात प्रांतातही तालिबानकडून जोरदार हल्ले सुरू आहेत. या प्रांतात भारताने बांधलेल्या सलमा धरणावर तालिबानने हल्ला केला. मात्र, हा हल्ला करून तालिबानी फसले. अफगाण जवानांनी तालिबानी हल्लेखोरांना जोरदार प्रत्युत्तर दिले आणि हुसकावून लावले.

अफगाणिस्तान सरकारने याबाबतची माहिती दिली. हेरात प्रांतातील सलमा धरणावर तालिबानींनी हल्ला केला. मात्र, हा हल्ला अफगाण जवानांनी हाणून पाडला. या हल्ल्यात तालिबानींचे मोठे नुकसान झाले असल्याचे अफगाणिस्तान सरकारने म्हटले.

अफगाणिस्तानच्या संरक्षण मंत्रालयाचे प्रवक्ते फवाद अमान यांनी एका ट्विटमध्ये म्हटले की, तालिबानी दहशतवाद्यांनी तीन ऑगस्ट रोजी भारत-अफगाणिस्तान मैत्री धरण म्हणून प्रसिद्ध असलेल्या सलमा उडवून लावण्याचा प्रयत्न केला. मात्र, अफगाण जवानांनी तातडीने प्रत्युत्तर दिले. अफगाण जवानांच्या प्रत्युत्तरानंतर तालिबानी हल्लेखोरांनी पळ काढला असल्याची माहिती त्यांनी दिली.

जुलै महिन्यातही तालिबानींनी सलमा धरणावर हल्ला करण्याचा प्रयत्न केला होता. तालिबानने रॉकेट हल्ला केला होता. मात्र, हे रॉकेट धरणाजवळ पडले. त्यामुळे धरणाला कोणतेही नुकसान झाले नाही.

हेरात प्रांतातील चेशते शरीफ जिल्ह्यात सलमा धरण हे अफगाणिस्तानमधील सर्वात मोठे धरण आहे. या धरणामुळे हजारो कुटुंबांना सिंचनासाठी पाणी आणि वीज उपलब्ध होते. हे धरण अफगाणिस्तानमध्ये भारताने केलेल्या विकासकामातील महत्त्वाच्या प्रकल्पातील एक आहे.