'मला सनातन धर्माबद्दल शिकवू नका' बोल्ड ड्रेस घालुन ट्रोल करणाऱ्यांवर भडकली कंगना

 

लोकनेता  न्यूज

(ऑनलाईन न्यूज नेटवर्क)

 

मुंबई : वाद आणि अभिनेत्री कंगना रनौत हे समीकरण आता नवीन नाही. पुन्हा एकदा सोशल मीडियावर कंगनावरून वादंग निर्माण झाला आहे. निमित्त ठरले ते कंगनाने घातलेल्या बोल्ड पेहेरावातील फोटो शूटचे. कंगनाच्या 'धाकड' सिनेमाचे चित्रीकरण पूर्ण झाले. हे चित्रीकरण बुडापेस्ट येथे सुरू होते. चित्रीकरण संपल्याच्या निमित्ताने आयोजित केलेल्या पार्टीमध्ये कंगनाने कोर्सेट ब्रालेट आणि पॅन्ट घातली होती.

अत्यंत पारदर्शक अशा कपड्यांमध्ये कंगनाने फोटोशूट केले आणि ते फोटो सोशल मीडियावर पोस्ट केले. त्यानंतर कंगनाला सोशल मीडियावर युझर्सने खूप ट्रोल केले. असे फोटो शेअर करत कंगनाने भारतीय संस्कृतीचा अवमान केल्याच्या प्रतिक्रिया व्यक्त होऊ लागल्या.

बोल्ड फोटोंवरून ट्रोल झाल्यावर गप्प बसेल ती कंगना कसली. तिने देखील ट्रोलर्सना सडेतोड उत्तर दिले. कंगनाने तिच्या इन्स्टाग्राम स्टोरीवर प्राचीन काळातील एका युवतीचा फोटो पोस्ट केला. हा फोटो पोस्ट करत कंगनाने लिहिले, 'जे लोक मला सनातन धर्माबद्दल ज्ञान देत आहेत त्यांनी कृपया लक्षात घ्या तुम्ही अब्राहमिक सारखे वागत आहात.'

काय म्हणाले होते ट्रोलर्स

कंगनाचे अत्यंत बोल्ड अंदाजातील फोटो पाहून एका युझरने लिहिले, 'परदेशात गेल्यावर भारतीय संस्कृती विसरून गेलीस? देशात आल्यानंतर धर्म,सभ्यता, रीति रिवाज यांच्यावर तू सर्वांना ज्ञान देणार का गं ताई?' तर आणखी एका युझरने लिहिले ,' तू तर कायम दुसऱ्यांनी काय कपडे घातले यावर त्यांना अनाहूतपणे सल्ले देतेस, आता तू स्वतः काय घातले आहेस?' कंगनाचा हा अतिशय बोल्ड लुक पाहून अनेकजण हैराण झाले आहेत. त्यातूनच एका युझरने लिहिले, 'तुझ्याकडून ही अपेक्षा नव्हती कंगना, तू खूपच अश्लील कपडे घातले आहेस..' तर आणखी एका युझरने लिहिले की, 'अशा पद्धतीचे फोटो तू पोस्ट करायला नको होते. कारण तू आमची रोल मॉडेल आहेस.'

कंगनाच्या आगामी सिनेमांबद्दल सांगायचे तर 'धाकड' सिनेमामध्ये तिने अग्नी एजंटची भूमिका साकारली आहे. या सिनेमामध्ये अर्जुन रामपाल आणि दिव्या दत्ता आहे. त्याशिवाय कंगना तेजस आणि तामिळनाडूच्या माजी मुख्यमंत्री दिवंगत जयललिता यांच्या आयुष्यावर आधारीत असलेल्या 'थलायवी' या सिनेमातही दिसणार आहे.