'अजेय योद्धा' थोरले बाजीराव पेशव्यांच्या समाधीस्थळाचा जिर्णोद्धार

 लोकनेता  न्यूज

(ऑनलाईन न्यूज नेटवर्क)

 

पुणे : इतिहासाने 'अजेय योद्धा' म्हणून गौरविलेल्या श्रीमंत थोरले बाजीराव पेशवे यांचे रावेरखेडी (मध्य प्रदेश) येथील समाधीस्थळ आता कात टाकणार आहे. मध्य प्रदेश सरकारने या समाधीस्थळाचा जिर्णोद्धार आणि विकासासाठी शंभर कोटी रुपयांची व्यापक योजना आखली आहे.

या योजनेच्या पहिल्या टप्प्यातील २७ कोटी रुपयांच्या विकासकामाचे भूमिपूजन नुकतेच मध्य प्रदेशचे मुख्यमंत्री शिवराजसिंह चौहान यांच्या हस्ते झाले. या प्रकल्पात बाजीरावांचा भव्य पुतळा, समाधी स्थळाजवळ नर्मदा नदीवर शनिवारवाड्याच्या दिल्ली दरवाजाची प्रतिकृती असलेला भव्य घाट, बाजीरावांच्या पत्नी काशीबाई यांनी बांधलेल्या शिवमंदिराचा जीर्णोद्धार, भव्य संग्रहालय, पर्यटक निवास, व्यापारी संकुल आणि समाधीस्थळाकडे जाण्यासाठी सहा किलोमीटरचा चौपदरी रस्ता करण्यात येणार आहे.

या कार्यक्रमाला केंद्रीय नागरी विमान वाहतूक मंत्री ज्योतिरादित्य शिंदे, मध्य प्रदेशच्या सांस्कृतिक मंत्री उषा ठाकूर, कृषिमंत्री कमल पटेल, ज्येष्ठ इतिहासतज्ज्ञ पांडुरंग बलकवडे, मस्तानीसाहेबांचे वंशज अवेश बहाद्दूर, होळकर घराण्याचे वंशज यशवंतराव होळकर, बाजीराव स्मारक समितीचे सचिव श्रीपाद कुलकर्णी आणि समितीचे पुणे सदस्य श्रीनिवास कुलकर्णी आदी उपस्थित होते. समितीतर्फे यावेळी बाजीरावांचे समाधीस्थळ सुशोभित करण्यात आले होते.