भंडारदरा परिसरात पर्यटकांचा धुडघूस ; ग्रामस्थांसह पोलिसांनाही केली मारहाण

 

*करोनाची लाट ओसरताच पर्यटन स्थळांवर पर्यटकांच्या लाटा

*भंडारदरा इथंही पर्यटकांची मोठी गर्दी

लोकनेता  न्यूज

(ऑनलाईन न्यूज नेटवर्क)

 

अहमदनगर: करोनाचे निर्बंध शिथील केल्याने आणि पाऊस सुरू झाल्याने भंडारदरा परिसरात पर्यंटकांची गर्दी वाढली आहे. मात्र, तोल सुटलेल्या पर्यटकांचा पोलिस आणि स्थानिक ग्रामस्थांनाही उपद्रव होत आहे. शनिवारी सायंकाळी पाच पर्यटकांनी ग्रामस्थांना आणि पोलिसांना मारहाण केली. त्यातील दोघे पर्यटक सैन्य दलात असल्याचे सांगण्यात आले. ग्रामस्थांच्या मदतीने पोलिसांनी त्यांना पकडून कारवाई केली.

भंडारदरा धरणात एक पर्यटक बुडाल्याची माहिती पोलिसांना मिळाली. त्यानुसार पोलिस तेथे आले होते. बराच काळ शोध घेतल्यानंतरही पोलिसांच्या हाती काहीच लागले नाही. सायंकाळ झाल्याने पोलिस परत जाऊ लागले. त्यावेळी काही मद्यधुंद पर्यटकांनी पोलिसांना दमबाजी करण्यास सुरुवात केली. पोलिसांची संख्या कमी होती. त्यामुळे तेथील व्यावसायिक प्रकाश खाडे मदतीला धावून आले. त्यांनी मध्यस्थी करण्याचा प्रयत्न केला. त्यावर त्या पर्यटकांनी खाडे यांनाच मारहाण सुरू केली. ‘ आम्ही आर्मीवाले आहोत, आम्हाचे कोणी काही करू शकत नाही,’ असे म्हणत त्यांनी मारहण केली.

पोलिस मध्यस्थी करून लागले. तर पर्यटकांनी पोलिसांनाही शिवीगाळ, दमबाजी केली. काहींनी पोलिसांना पकडून धक्काबुक्की केली. हे दृश्य पाहून आणखी काही ग्रामस्थ मदतीला धावले. त्यांच्या मदतीने या गोंधळ घालणाऱ्या पर्यटकांना पकडून पोलिसांनी राजूर पोलिस ठाण्यात आले. त्यांच्याविरुद्ध गुन्हे दाखल करण्यात आले. घटनास्थळी गेलेले सहायक पोलीस उपनिरीक्षक नितीन खैरनार, पोलीस कर्मचारी दत्तात्र्य परते यांच्याशी या पर्यटकांनी वाद घातला. गोंधळ घालणारे पर्यटक वडगाव लांडगा, वाघापूर, हिवरगाव आंबरे येथील असून दोन मोटारींतून ते भंडारदऱ्याला आले होते, असे सांगण्यात आले.

पर्यटकांची तोबा गर्दी

सध्या भंडारदरा परिसरात पर्यटकांची गर्दी वाढली आहे. राज्यात वीकेण्ड लॉकडाउन लागू करण्यात आल्याने शनिवार-रविवारी व्यवहार बंद असतात. त्यामुळे या दोन दिवशी पर्यटनाला येणाऱ्यांची संख्या जास्त आहे. गर्दी टाळण्याच्या उद्देशाने सरकारने निर्बंध घातले असले तरी उलट याच दिवशी जास्त गर्दी होताना दिसत आहे. पोलिसांनाच धक्काबुक्की केली जात असल्याने अशा पर्यटकांना आवर घालणेही अवघड झाले आहे.