Ticker

6/Breaking/ticker-posts

‘ कमाल हो गया ..! ’ शंभरीतल्या अनेक आजीबाईंची करोनावर ' यशस्वी ' मात

 


लोकनेता न्यूज

( ऑनलाईन न्यूज नेटवर्क)

 

जामखेड: देशभरातून करोना बाधितांचे आणि त्यामुळे होणाऱ्या मृत्यूंचे धडकी भरविणारे आकडे पुढे येत आहेत. तरुण वयातील अनेकांचा बळी गेल्याची उदाहरणे असताना कर्जत-जामखेडमधून दिलासादायक चित्र पुढे आले आहे. शंभरी गाठलेल्या आणि ओलांडलेल्या अनेक महिला कोविड केअर सेंटरमध्ये उपचार घेऊन बऱ्या झाल्या आहेत. १०२ वर्षांच्या चंपाबाई मुळे, १०० वर्षांच्या विठाबाई भवर, ९८ वर्षांच्या काशिबाई तोडमल एवढेच नव्हे तर हृदयशस्त्रक्रिया झालेल्या ७५ वर्षीय पुष्पा बेद्रे यांनीही करोनावर यशस्वी मात केली आहे. यांच्याप्रमाणेच अनेक ज्येष्ठ महिला बऱ्या होऊन परतल्याची नोंदी या दोन्ही तालुक्यांतील कोविड केअर सेंटरला आहेत.

करोनाबद्दल सध्या सर्वत्र भीतीचा वातावरण असताना योग्य उपचार आणि इच्छाशक्तीच्या जोरावर यातून बरे होता येते, हेच या ज्येष्ठ महिलांना दाखवून दिले आहे. राष्ट्रवादीचे आमदार रोहित पवार यांच्या पुढाकारातून या दोन्ही तालुक्यांत आवश्यक त्या आरोग्य सुविधांसह कोविड केअर सेंटर सुरू आहेत. तेथे दखल होणाऱ्या रुग्णांची आरोग्य यंत्रणेकडून पुरेपूर काळजी घेऊन त्यांना मानसिक आधारही दिला जात आहे. याचे सकारात्मक परिणाम दिसून येत आहेत.

जामखेड येथील सारोळा गावच्या १०२ वर्षीय चंपाबाई तुकाराम मुळे या आरोळे कोविड सेंटर येथे पाच दिवस उपचार घेतल्यानंतर ठणठणीत बऱ्या होऊन घरी परतल्या. जामखेडमधीलच विठाबाई रामा भवर या १०० वर्षीय आजींनी देखील आरोळे रुग्णालयात दहा दिवस उपचार घेऊन त्यांनी करोनावर यशस्वीरीत्या मात केली. चौंडी गावच्या ६३ वर्षीय गयाबाई बाबासाहेब खरात यांचा एचआरसीटी स्कोअर १६ होता. ऑक्सिजन पातळीही खालावली होती. मात्र जिद्द न हरता चिंतामुक्त राहून डॉक्टरांच्या उपचारांना साथ देत ९ दिवसांत त्या बऱ्या झाल्या.

कर्जत तालुक्यातील बहिरोबावाडीच्या ९८ वर्षीय काशीबाई यशवंत तोरडमल कर्जत उपजिल्हा रुग्णालय आठ दिवस उपचार घेऊन बऱ्या झाल्या. भांबोरा गावच्या ७५ वर्षीय पुष्पा आजिनाथ बेद्रे या तर आधीच गंभीर आजाराची लढा देत आहेत. त्यांच्यावर वर्षभरापूर्वीच अँजीओप्लास्टी झाली होती. काही दिवसांपूर्वी शरीरातील रक्ताच्या कमरतेमुळे त्यांना रक्त द्यावे लागले होते. त्याच दरम्यान त्यांना करोनाचीही लागण झाल्याचे आढळून आले. त्यांना कर्जत उपजिल्हा रुग्णालयात उपचारासाठी दाखल करण्यात आले होते. योग्य उपचार आणि बरे होण्याचा आत्मिवश्वास ठेवलेल्या बेद्रे पाच दिवसांतच करोनामुक्त होऊन घरी परतल्या.

या मतदारसंघातील आरोग्य यंत्रणा आणि व्यवस्थेवर पवार लक्ष ठेवून आहेत. स्वत: कोविड सेंटरला भेटी देऊन रुग्णांची संवाद साधत आहेत. उपचार घेणारे आणि बरे झालेले रुग्ण त्यांना धन्यवाद देतात. पवार यांच्या पुढाकारातून कर्जत व जामखेडमध्ये प्रत्येकी १ हजार खाटांचे जम्बो कोविड केअर सेंटर सुरु आहेत.

रुग्ण बरे होऊन आपल्या घरी परतत आहेत, ही खूप समाधानकारक बाब आहे. त्याहूनही शंभरीच्या घरातील अतिज्येष्ठ व्यक्तीही करोनावर विजय मिळवत आहेत, ही बाब आपल्या प्रत्येकासाठी दिलासा देणारी आहे. डगमगून न जाता वैद्यकीय उपचारांची साथ व सकारात्मक विचार मनात ठेवत नेटाने सामना केल्यास आपण करोनामुक्त होऊ शकतो.” -रोहित पवार, आमदार

टिप्पणी पोस्ट करा

0 टिप्पण्या