Ticker

6/Breaking/ticker-posts

मोदी सरकारच्या 'या' निर्णयावर शरद पवार नाराज ; लिहिलं खरमरीत पत्र

 








लोकनेता न्यूज

( ऑनलाईन न्यूज नेटवर्क  )

 

मुंबई: केंद्र सरकारने खतांच्या किंमती वाढवल्याने नवं संकट शेतकऱ्यांवर कोसळलं असून राष्ट्रवादी काँग्रेसचे राष्ट्रीय अध्यक्ष शरद पवार यांनी खतांच्या दरवाढीवर तीव्र नाराजी व्यक्त केली आहे. सध्याच्या संकटांच्या काळात खतांच्या किंमती वाढवणे हा शेतकऱ्यांच्या जखमेवर मीठ चोळण्याचाच प्रकार असून ही दरवाढ तातडीने मागे घेण्यात यावी, अशी मागणी शरद पवार यांनी केंद्रीय रसायने व खते मंत्री सदानंद गौडा यांच्याकडे केली आहे.


शरद पवार यांनी केंद्रीय मंत्री गौडा यांना आज एक पत्र लिहिलं असून खतांच्या दरवाढीवर तीव्र शब्दांत आपला आक्षेप नोंदवला आहे. सध्याच्या स्थितीवर बोट ठेवत शरद पवार यांनी केंद्राचा 
खत दरवाढीचा निर्णय धक्कादायक असल्याचे नमूद केले आहे. या निर्णयाचा तातडीने पुनर्विचार व्हावा व दरवाढ मागे घेण्यात यावी, अशी मागणी पवार यांनी पत्रात केली आहे. देशात करोना संसर्गाच्या दुसऱ्या लाटेचा कहर सुरू आहे. या लाटेचा तडाखा सर्वांनाच बसला आहे. शेतकऱ्यांसाठी तर हा आतापर्यंतचा सर्वाधिक कठीण काळ आहे. अशावेळी शेतकऱ्याच्या समस्यांकडे सरकारने प्राधान्याने लक्ष देण्याची गरज असताना त्याच्या उलट कारभार सुरू आहे. बळीराजाला मदतीचा हात देण्याऐवजी केंद्र सरकारने खतांच्या किंमती वाढवण्याचा निर्णय घेऊन शेतकऱ्यांच्या समस्यांत भर घालण्याचे काम केले आहे, अशा शब्दांत शरद पवार यांनी आपली नाराजी व्यक्त केली आहे.



करोनामुळे देशातील अनेक भागांत सातत्याने
 लावावे लागत आहे. त्यातून बाजार व्यवस्था कोलमडल्याने त्याचा मोठा फटका शेतमालाला आणि परिणामी शतेकऱ्याला बसला आहे. आता पावसाळा जवळ आला आहे. खरिप हंगाम तोंडावर आहे. अशावेळी खतांच्या वाढीव किंमतीमुळे शेतीवरील खर्चात आणखी वाढ होणार आहे. आधीच इंधनाचे दर वाढल्याने आर्थिक भार पडला असताना आता खत दरवाढ करून शेतकऱ्याच्या जखमेवर मीठ चोळण्याचेच काम केंद्र सरकारने केले आहे, असे पवार यांनी पुढे नमूद केले आहे. या प्रश्नी आपण व्यक्तिश: लक्ष घालून खतांच्या वाढीव किंमती पूर्ववत केल्यास मला आनंद होईल, अशी विनंती शरद पवार यांनी सदानंद गौडा यांना केली आहे. करोनाच्या या संकटकाळात शेतकऱ्यांना जास्तीत जास्त मदत होईल, असे निर्णय अपेक्षित असल्याचेही पवार यांनी पुढे नमूद केले.

टिप्पणी पोस्ट करा

0 टिप्पण्या