भारताने कठीण काळात जगाला मदत केली, आता जगाने आपले कर्तव्य पार पाडावे'

 

लोकनेता न्यूज

(ऑनलाईन न्यूज नेटवर्क)

न्यूयॉर्क: भारतात गंभीर होत जाणाऱ्या करोना महासाथीला आटोक्यात आणण्यासाठी जगभरातून मदतीचा हात पुढे आला आहे. या दरम्यान आता संयुक्त राष्ट्र संघाने भारतात वाढत जाणाऱ्या करोनाबाधितांच्या संख्येवरून गंभीर चिंता व्यक्त केली आहे. भारताने कठीण काळात अनेक देशांना लस पुरवठा केला आहे. त्यामुळे आता जगाने आपले कर्तव्य लक्षात भारताची मदत करावी असे आव्हान संयुक्त राष्ट्र संघाच्या ७५ व्या आमसभेचे अध्यक्ष वोल्कान बोजकिर यांनी केले. संयुक्त राष्ट्र संघानेही भारताला मदत करण्याचे आश्वासन दिले आहे.

संयुक्त राष्ट्र संघाच्या आमसभेचे अध्यक्ष वोल्कान बोजकिर यांनी ट्विट करून सांगितलेकी, भारतातील करोना महासाथीमुळे निर्माण झालेली परिस्थिती पाहून चिंतित झालो आहे. भारताने गरीब, विकसनशील देशांना कठीण काळात लस पुरवठा करण्यासाठी चांगले प्रयत्न केले. आता भारताला या कठीण काळात मदत करण्याची वेळ आली आहे. माझ्या संवेदना भारतीयांसोबत असल्याचे त्यांनी सांगितले.

संयुक्त राष्ट्र संघाचे महासचिव अँथोनिओ गुतारेस यांच्या प्रवक्त्यांनी सांगितले की, करोनाबाधितांची आणि मृतांची वाढती संख्या लक्षात घेता भारताला संयुक्त राष्ट्र संघाकडून शक्य ती मदत देण्यात येणार आहे. संयुक्त राष्ट्र संघाचे अधिकारी भारतीय अधिकाऱ्यांच्या संपर्कात आहेत.

संयुक्त राष्ट्र संघाच्या महासचिवांचे उपप्रवक्ते फरहान हक यांनी सांगितले की, आम्ही विविध पातळींवर भारतीयांच्या संपर्कात आहोत. आम्ही भाारताच्या स्थायी प्रतिनिधींसोबत चर्चा केली आहे. संयुक्त राष्ट्र संघातील भारताचे स्थायी प्रतिनिधी टी.एस. तिरुमुर्ती यांच्या संपर्कात असल्याचे त्यांनी सांगितले.

दरम्यान, फ्रान्सनेही भारताच्या मदतीसाठी एकजुटता अभियान सुरू केले आहे. या अभियानातंर्गत भारताला वैद्यकीय उपकरणे, सामग्री मिळणार आहे. करोनाशी झुंजणाऱ्या भारतीयांच्या मदतीसाठी मोहीम सुरू करण्यात आली असल्याचे फ्रान्सच्या परराष्ट्र खात्याने म्हटले. फ्रान्सकडून भारताला आठ ऑक्सिजन जनरेटर मिळणार आहेत. त्याद्वारे प्रति जनरेटरमधून पुढील किमान १० वर्षांसाठी २५० खाटा असलेल्या रुग्णालयाला ऑक्सिजनचा पुरवठा करता येण्याची क्षमता आहे. पहिल्या खेपमध्ये लिक्विड मेडिकल ऑक्सिजनचे पाच कंटेनर पाठवण्यात येत आहे. त्याद्वारे एका दिवसात किमान १० हजार रुग्णांना ऑक्सिजनचा पुरवठा करता येऊ शकतो. त्याशिवाय २८ व्हेंटिलेटरही पाठवण्यात येणार आहे.