पंकजा मुंडेंनी घेतला बुथरचनेचा आढावा

 

लोकनेता न्यूज

( ऑनलाईन न्यूज नेटवर्क ) 

बीड:-गोपीनाथराव मुंडे यांनी मेहनतीने हा मतदारसंघ उभा केला आहे, त्यांची मेहनत व्यर्थ जाता कामा नये, त्यासाठी मरगळ झटकून पुन्हा कामाला लागा, असे आवाहन भारतीय जनता पक्षाच्या राष्ट्रीय सचिव  पंकजा मुंडे यांनी गुरुवारी येथे केले. मुंडे यांनी परळी ग्रामीणचे शक्ती केंद्रप्रमुख व प्रभारींची बैठक घेऊन आढावा घेतला. भाजपचे जिल्हाध्यक्ष राजेंद्र मस्के, सरचिटणीस प्रा. देविदास नागरगोजे, समन्वयक शंकर देशमुख या वेळी उपस्थित होते.

त्या म्हणाल्या की, सत्तेची दोन वेळा संधी सोडली तर, आपण विरोधी बाकावरच जास्त काळ होतो, सुरवातीपासून आपण पक्ष संघटनेवर भर दिला होता. आता पुन्हा एकदा तशीच सुरवात करायची आहे. प्रत्येक बुथ मजबुत असणे आवश्यक आहे. “वन बुथ टेन युथ” या धोरणात पक्षाने बदल केला असून आता 'वन बुथ थर्टी युथ' अशी बांधणी करायची आहे. बुथ रचना ऑनलाइन होणार असून त्यासाठी ॲपदेखील कार्यान्वित करण्यात येणार आहे. पक्षाच्या स्थापना दिली, सहा एप्रिलला गावोगावी शाखा स्थापन्याचा संकल्प करत पुन्हा ताकदीने मैदानात उतरण्यासाठी सज्ज व्हावे.

तालुकाध्यक्ष सतीश मुंडे, युवा मोर्चाचे जिल्हाध्यक्ष निळकंठ चाटे, ज्येष्ठ नेते जीवराज ढाकणे, शिवाजीराव गुट्टे, श्रीहरी मुंडे, रमेश कराड, डॉ. शालिनी कराड, राजेश गिते, उत्तमराव माने, व्यंकटराव कराड, जिल्हा परिषदेचे प्रदीप मुंडे, पंचायत समितीचे सदस्य भरत सोनवणे आदी उपस्थित होते. बैठकीचे संचलन चंद्रकांत देवकते यांनी केले.