लोकनेता न्यूज
(ऑनलाईन न्यूज नेटवर्क)
अहिल्यानगर -
अहमदनगर जिल्हा सहकारी बँकेच्या रिक्त चेअरमन पदासाठी आज सोमवारी (दि.24) घेण्यात आलेल्या निवड प्रक्रियेत माजी आमदार चंद्रशेखर घुले पाटील यांची बिनविरोध निवड झाली आहे.
सकाळी ११ वाजता जिल्हा उपनिबंधक मंगेश सुरवसे यांच्या अध्यक्षतेखाली संचालक मंडळाची अधिकृत बैठक पार पडली.
यापूर्वी सकाळी ९ वाजता नगरमधील राज पॅलेस येथे संचालकांची अनौपचारिक चहापान बैठक झाल्याचे समजते. या बैठकीत अध्यक्षपदासाठी घुले यांच्या नावावर शिक्कामोर्तब झाले, त्यानंतर अधिकृत बैठकीत त्यांची निवड बिनविरोध पार पडली.
या निवडीनंतर मंत्री राधाकृष्ण विखे पाटील यांची पडद्यामागील भूमिका निर्णायक ठरल्याची राजकीय वर्तुळात चर्चा आहे. घुले हे कोपरगावचे आमदार आशुतोष काळे यांचे सासरे असल्याने, काळे–विखे यांच्यातील सध्याची 'राजकीय सोयरीक' या निवडीच्या पार्श्वभूमीवर महत्त्वाची मानली जात आहे.
चेअरमन निवडीसाठी मतदानाधिकार असलेल्या संचालकांमध्ये मोनिका राजळे, आण्णासाहेब म्हस्के , अंबादास पिसाळ, अमोल राळेभात, आशा तापकीर, भानुदास मुरकुटे, सीताराम गायकर, अरुण तनपुरे, राहुल जगताप, आशुतोष काळे, प्रशांत गायकवाड, अनुराधा नागवडे, अमित भांगरे, गीतांजली शेळके, माधवराव कानवडे, करण ससाणे, गणपतराव सांगळे व शंकरराव गडाख या सदस्यांचा समावेश आहे.
निवड प्रक्रियेपूर्वी अनेक संचालकांनी पुढील राजकीय समीकरणांच्या दृष्टीने विखे पाटील यांच्या भूमिकेला समर्थन देणे क्रमप्राप्त असल्याने, घुले यांच्या समर्थनाचा कल दिसून आला. त्यामुळे घुले यांच्या बिनविरोध निवडीचा मार्ग मोकळा झाला. आ. चंद्रशेखर घुले पाटील यांनी विश्वास व्यक्त केल्याबद्दल संचालक मंडळाचे आभार मानले, तसेच ना. राधाकृष्ण विखे पाटील यांनी केलेल्या सहकार्याबद्दल कृतज्ञता व्यक्त केली. या निवडीने घुले समर्थकांनी आनंद व्यक्त केला आहे.
0 टिप्पण्या