नारायण राणे यांना ‘ जोर का झटका धिरेसे’ विजेच्या शॉकनंतर राणें सावरले..

 

लोकनेता  न्यूज

(ऑनलाईन न्यूज नेटवर्क)

 

कणकवली: केंद्रीय मंत्री नारायण राणे यांच्या अटकेनेतर स्थगित झालेली जन आशीर्वाद यात्रा कालपासून पुन्हा सुरू झाली असून राणे या यात्रेदरम्यान मुख्यमंत्री उद्धव ठाकरे आणि शिवसेनेवर नेहमीपेक्षा अधिक आक्रमक होत घणाघाती टीका करत आहेत. रत्नागिरीतून पुढे निघालेली ही यात्रा आज सिंधुदुर्गात पोहोचली आहे. येथे राणेंचे ढोल-ताशांच्या गजरात जंगी स्वागत करण्यात आले. ठिकठिकाणी रोशनाई देखील करण्यात आले होते. हा स्वागतसोहळा सुरू असताना राणे यांना एके ठिकाणी हाताला विजेचा शॉक लागला. हा प्रकार कॅमेऱ्यात कैद झाला आहे.

रत्नागिरीतून जन आशीर्वाद यात्रा पुन्हा सुरू केल्यानंतर केंद्रीय मंत्री राणे आज सिंधुदर्गातील कणकवली येथे दाखल झाले. तेथे त्यांनी छत्रपती शिवाजी महाराज यांच्या पुतळ्याला पुष्पहार अर्पण केला. त्यानंतर ते तेथून निघत होते. आसपास मोठी गर्दी होती. छत्रपतींच्या पुतळ्याला असलेल्या रेलिंगवर विद्युत रोषणाई करण्यात आली होती. त्यातील एका लोखंडी रेलिंगवर राणे यांनी आधारासाठी हात ठेवला आणि त्यांना एकच शॉक बसला. राणे यांनी तातडीने हात झटकून काढून घेतला.

नारायण राणे यांना ज्यावेळी विजेचा शॉक लागला, त्या वेळी विधान परिषदेतील विरोधी पक्षनेते प्रवीण दरेकर हे सोबत होते. त्यांनी राणे यांना शॉक लागल्याचे पाहिले आणि तेही सावध झाले. त्यांना आजूबाजूच्या कार्यकर्त्यांना तत्काळ सावध होण्यास सांगितले. या घटनेनंतर केंद्रीय मंत्री नारायण राणे यांनी रेलिंगवर करण्यात आलेल्या विद्युत रोषणाईची दुरुस्ती करण्याचे आदेश दिले.

दरम्यान, नारायण राणे यांच्या जन आशीर्वाद यात्रेत कोणताही खंड पडलेला नसून ही यात्रा वेळापत्रकाप्रमाणे सुरू आहे. या यात्रेदरम्यान नारायण राणे यांना संरक्षण मंत्री राजनाथ सिंह यांचा फोनही आला. राजनाथ सिंह यांनी राणे यांच्या तब्येतीची विचारपूस केली. त्यावेळी राणे यांनी आपल्या तब्येतीची माहिती दिली. माझी तब्येत उत्तम असून मी रुग्णालयात वैगेरे दाखल झालो नाही, घरीच होतो. माझी तब्येत बिघडली अशी त्यांनी हवा पसरवली अशी माहिती राणे यांनी राजनाथ सिंह यांना दिली.