लसीकरण : राज्यभरात खोळंबा ? ; मुंबईतही उद्या आणि परवा लसीकरण बंद राहणार

 

लोकनेता न्यूज

( ऑनलाईन न्यूज नेटवर्क   )

 मुंबई : करोना विषाणूविरोधातील लढाईत महत्त्वाचं अस्त्र ठरत असलेल्या लसीकरणात अनेक ठिकाणी अडथळे येत आहेत. तसंच दिवसभर रांगेत उभं राहूनही अनेकांना लस मिळत नसल्याच्या तक्रारी समोर येत आहेत. संपूर्ण राज्यातच शनिवार आणि रविवार लसीकरण मोहीम बंद राहणार असल्याची माहिती समोर येत आहे. कोविन अॅपच्या अपडेशनसाठी लसीकरण बंद ठेवण्यात येणार असल्याचं सांगितलं जात आहे. मात्र याबाबत अद्याप कोणतीही अधिकृत माहिती देण्यात आली आहे. आगामी दोन दिवस जर खरंच लसीकरण प्रक्रिया बंद ठेवली जाणार असेल तर लस घेण्याच्या प्रतीक्षेत असणाऱ्या नागरिकांचा मोठा हिरमोड होणार आहे.

दरम्यान, महाराष्ट्रात कालपर्यंत १ कोटी ९५ लाख ३१ हजार ५१ नागरिकांचे लसीकरण करण्यात आले. १३ मे २०२१ रोजी ३७१८ लसीकरण सत्रांच्या माध्यमातून ३ लाख ४१ हजार ८८७ लाभार्थ्यांना लसीकरण करण्यात आले.

मुंबईतही उद्या आणि परवा लसीकरण बंद

अशातच आता मुंबईत शनिवार आणि रविवार असे दोन दिवस लसीकरण बंद राहणार असल्याची माहिती महानगर पालिकेने दिली आहे.
' मुंबईकरांनो, आम्ही सूचित करू इच्छितो की १५ व १६ मे, २०२१ रोजी लसीकरण प्रक्रिया बंद ठेवण्यात येत आहे. लसीकरणाविषयी पुढील माहिती आपल्याला लवकरच कळवण्यात येईल,' अशी माहिती मुंबई महानगरपालिकेच्या अधिकृत ट्विटर हँडलवरून देण्यात आली आहे.