PM मोदी पहिल्यांदाच 'या' खास विमानाने बांगलादेशच्या दौऱ्यावर..

 

लोकनेता न्यूज

( ऑनलाईन न्यूज नेटवर्क )

नवी दिल्ली:-पंतप्रधान नरेंद्र मोदी हे जवळपास वर्षभरानंतर परदेश दौऱ्यावर गेले आहेत. पंतप्रधान मोदी हे बांगलादेशमध्ये दोन दिवसाच्या दौऱ्यावर दाखल झाले आहेत. या दोन दिवसांच्या दौऱ्यात पंतप्रधान नरेंद्र मोदी हे बांगलादेशच्या स्वातंत्र्याच्या सुवर्ण महोत्सवी वर्षानिमित्त आयोजित कार्यक्रमात सहभागी होणार आहेत. बांगलादेश दौऱ्यासाठी पंतप्रधान नरेंद्र मोदी हे एअर इंडियाच्या 'एअर इंडिया वन' या विशेष विमानाने दाखल झाले आहेत. हे विमान अमेरिकेहून भारताच्या ताफ्यात आल्यानंतरचा हा पहिलाच दौरा आहे. अमेरिकेच्या राष्ट्राध्यक्षांच्या एअरफोर्स वनप्रमाणे क्षमता असलेल्या या विमानाची अनेक वैशिष्ट्ये आहेत. पंतप्रधानांव्यतिरिक्त राष्ट्रपती आणि उपराष्ट्रपती देखील या विमानाचा वापर करणार आहेत. आतापर्यंत पंतप्रधान इंडिया वन असे कॉल साइन असलेले बोइंग-७४७ चा वापर करत आले आहेत.

पंतप्रधानांच्या नरेंद्र मोदी यांच्या या खास विमानात बसण्यासाठी अतिशय आरामदायक अशा सीटची व्यवस्था करण्यात आलेली आहे. देशाच्या पंतप्रधानांना अनेकवेळा परदेश दौऱ्यावर जावे लागते. या दौऱ्यात त्यांना दीर्घ प्रवास देखील करावा लागतो. लांब पल्ल्याचा प्रवास लक्षात घेऊनच या विमानातील बसण्याच्या सीटची निर्मिती करण्यात आली आहे. या सीट अधिक आरामदायी आहेत. आरामदायी आसन व्यवस्था हे देखील या विमानाचे एक वैशिष्ट्य म्हणता येईल.

विमानात आहे मिटिंग रूम

पंतप्रधानांच्या या खास विमानात अतिशय उत्कृष्ट असे एक मिटिंग रूम देखील देण्यात आले आहे. या रूममध्ये बसून पंतप्रधान नरेंद्र मोदी आपली बैठक घेऊ शकणार आहेत. या विमानात वापरण्यात आलेले रंग हे देखील या विमानाचे एक वैशिष्ट्य म्हणता येईल. या विमानात पांढरा, फिक्कट निळा आणि नारंगी रंगाचा वापर करण्यात आला आहे. विमानात फिक्कट निळा आणि पांढरा रंग सर्वाधिक वापरण्यात आला आहे. नारंग हा रंग विमानाच्या मध्यमागी रेषा ओढण्यासाठी वापरण्यात आलेला आहे.

हवाईदलाचे वैमानिक चालवणार पंतप्रधानांचे हे विमान

अनेक वैशिष्ट्यांनी युक्त असलेले पंतप्रधानांचे हे विमान भारतीय हवाईदलाचे वैमानिक चालवणार आहेत. या विमानाची किंमत ८,४५८ कोटी रुपये इतकी आहे. हे विमान अतिशय सुरक्षित समजले जाते. या विमानात जॅमर बसवण्यात आले आहेत. या जॅमरमुळे शत्रूंच्या रडारचे सिग्नल जॅम होतात. या विमानावर क्षेपणास्त्र हल्ल्याचा देखील परिणाम होत नाही. हे विमान हवेत इंधन भरू शकते. हे विमान अमेरिके ते भारत असा सलग प्रवास करू शकणार आहे.

पंतप्रधानांचे बोइंग-७७७ हे विशेष विमान ३५ हजार फूटांच्या उंचीवर ताशी १ हजार १३ किमीच्या वेगाने उडू शकते. हे विमान सलग ६ हजार ८०० मैलाचे अंतर प्रवास करण्यास सक्षम आहे. या विमानाची कमाल ४५ हजार १०० फूटांच्या उंचीवर उडण्याची क्षमता आहे. या विमानाच्या उड्डाणासाठी ताशी १,८१,००० डॉलर (सुमारे १ कोटी ३० लाख रुपये) इतका खर्च अपेक्षित आहे.