१० लाखांचे हेरॉइनसह स्कुटी व पल्सर मोटरसायकल जप्त

 

लोकनेता न्यूज

( ऑनलाईन न्यूज नेटवर्क )

नवी मुंबई :- तळोजा येथील पिसार्वे गाव परिसरामध्ये हेरॉईन या अमली पदार्थाची विक्री करण्यासाठी आलेल्या दोघांना गुन्हे शाखा मध्यवर्ती कक्षाने व अमली पदार्थविरोधी पथकाने सोमवारी संध्याकाळी सापळा लावून अटक केली आहे. जसविंदर दलजित सिंग (२८) व साबिर रझाक पठाण (२३) अशी या दोघांची नावे असून गुन्हे शाखेच्या पथकाने या दोघांजवळ असलेले १०३ ग्रॅम वजनाचे १० लाख ३० हजार रुपये किमतीचे हेरॉईन तसेच, त्यांनी या गुन्ह्यात वापरलेली स्कुटी व पल्सर मोटरसायकल जप्त केली आहे.

तळोजा येथील पिसार्वे गावाजवळ असलेल्या साई शांती पार्क, आनंद इमारतीजवळ दोन व्यक्ती अमली पदार्थाची विक्री करण्यासाठी येणार असल्याची माहिती गुन्हे शाखा मध्यवर्ती कक्षाला मिळाली होती. त्यानुसार वरिष्ठ पोलिस निरीक्षक एन. बी. कोल्हटकर, अमली पदार्थविरोधी पथकाचे वरिष्ठ पोलिस निरीक्षक जयराज छाब्रिया, सहाय्यक पोलिस निरीक्षक गंगाधर देवडे व त्यांच्या पथकाने सोमवारी संध्याकाळी तळोजा येथील पिसार्वे गावाजवळ सापळा लावला होता. यावेळी आरोपी जसविंदर हा होंडा स्कुटीवरून तर साबिर हा पल्सरवरून तेथे आले. ते तेथे संशयास्पदरीत्या थांबल्यानंतर गुन्हे शाखेच्या पथकाने त्यांच्यावर पाळत ठेवून त्यांची धरपकड केली.

अधिकाऱ्यांनी या दोघांची झडती घेतली असता जसविंदरजवळ ६ लाख २० हजार रुपये किमतीचे ६२ ग्रॅम हेरॉईन तर साबिर पठाणजवळ ४ लाख १० हजार रुपये किमतीचे ४१ ग्रॅम हेरॉईन आढळून आले. हे पदार्थ कुठून आणले याबाबत या दोघांकडे चौकशी केली असता त्यांनी उडवाउडवीची उत्तरे दिली. त्यानंतर या पथकाने दोघांविरोधात तळोजा पोलिस ठाण्यात एनडीपीएस कलमान्वये गुन्हा दाखल करून त्यांना अटक केली. याबाबत पुढील तपास सुरू आहे